* နံပါတ် (၅) ကျွန်တော်ရေးတဲ့သူ့ဋီကာ
📝 ကျွန်တော်ရေးတဲ့သူ့ဋီကာ 📝
ရက်စွဲ - ၂၈.၁၂.၂၀၁၈
သူ....
ဆောင်းရာသီ မှန်၏။
မချမ်း မအေး
သို့သော် အသည်းခိုက်အောင် နေစိမ့်၏။
***
သူ....
ဆောင်းရာသီ မှန်၏။
နှင်းများမထူထပ်
သို့သော် စိတ်အစဉ်ကို မြူ မှုန်ဆိုင်းစေ၏။
***
သူ....
ဆောင်းရာသီ မှန်၏။
မြစ်ရေသည် မခဲ
သို့သော် နှလုံးသားကား ကျောက်ဖြစ်ရုပ်ကြွင်းလေလား?
***
သူ....
ဆောင်းရာသီ မှန်၏။
ခမ်းနားထည်ဝါ နှစ်လိုဖွယ်ကောင်း၏။
သို့သော် အညတရသာဖြစ်၏။
***
သူ....
ဆောင်းရာသီ မှန်၏။
ရာသီပန်းများ ပွင့်လန်း၏။
အရောင်အသွေးစုံလင်၏။
သို့သော် နှင်းဆီခိုင်မဟုတ်ပါပေ။
***
သူ....
ဆောင်းရာသီ မှန်၏။
အသစ်အသစ်တို့ သစ်လွင်ပြီးနောက်
တဖန် အသစ်အသစ်တို့ သစ်လွင်လာလိမ့်မည်။
ထို့ကြောင့် စွန့်လွှတ်တတ်ဖို့လိုကြောင်း တွေးမိစေ၏။
ကလောင်အမည် - သက်ကေသရာ
Comments
Post a Comment