* နံပါတ် (၈) ကူးပြောင်းချိန်
ရွာတော့မလို၊ ပြိုတော့မယောင်
မိုးသားတိမ်လိပ်၊ အရှေ့ထိပ်မှ
ရွေ့ရွေ့ချဉ်းလာ၊ သွေ့သွေ့ပူပြင်း
နေ့လည်ခင်းကား၊ မလင်းမမှုန်
သုန်သုန်သွေးဆော်၊လေပြေသော်မှ
ဖျဖျဖြူးစဉ်၊ ကုက္ကိုရွက်အို
ကြွေသည့်ခဏ၊မှင်သက်မိသည်
မူမမှန်သော..
ရာသီပြောင်းချိန်ပါပဲလေ။ ။
***
ထွက်တော့မလို၊ ဝင်တော့မယောင်
ပြင်းပြင်းရှူရှိုက်၊ မောဟိုက်နွမ်းလျ
ဝမ်းသာဝမ်းနည်း၊ လွမ်းမိတန်တန်
သန်မြန်တုန်းက၊ ထုံးဖွဲ့မာန
စာဂမရှိ၊ မသိဘာဝနာ
မေ့လျော့ကျေးဇူး၊ ပြုဖူးသူအား
ထူးထူးစွဲလမ်း၊ မမြဲဥစ္စာ
လောဘရမ္မက်၊ ဖက်တွယ်မိခဲ့
နေကွယ်ခဏ၊ နောင်တရသည်
မသေချာသော…
ဘဝကူးချိန်ပါပဲလေ။ ။
ကလောင်အမည် - သက်ကေသရာ
Comments
Post a Comment